1004. Je jure fidélité au …

Document recueilli par Paul Dangoxhe – Août 2001

AEL – Abbaye du Val Saint-Lambert – Rég. 71 – Fol 1 – Env 1670.

Forme de seriment a faire par tous officiers, maÿeurs, eschevins, tenants, greffiers, et sergeants.

Je (N…) jure a Dieu et a la glorieuse Vierge Marie que ie maintiendraÿ tousiours la foÿ catholicque apostolicque et romaine, et seraÿ fidel au Sr Abbé et convent du Val St Lambert, et garderaÿ, et deffendiraÿ leurs eglise, personnes, honneurs, droicts et biens, et ne participeraÿ a aucune machination contre eux ouverte, nÿ secrette, directement, nÿ indirectement, et si aucune de chose premise vinse a ma cognoissance la rapporteraÿ par moÿ ou par autruÿ, administreraÿ loÿ et justice en estant requis aux grands, moÿens et petits egallement sans acception des personnes, porte faveur, nÿ dissimulation, et garderaÿ les secrets de justice, et serviraÿ sÿncerement, et entierement le seigneur et la justice ou cour, et son officier ou commis gratis, en qualité de (maÿeur) (tenant) (eschevin) (greffier) (sergeant) en tout ce qui sera de mon office, sans pouvoir pretendre d’iceux aucuns droict ou salair pour aucune peine ou vacation que i’auraÿ emploié pour leur service en telle qualité que dit est.

Ainsi m’aÿde Dieu, la benoite Vierge, et tous les Saincts de Paradis.